Зварот за ўключэнне ў школьную праграму экскурсій у Курапаты накіраваны ў Мінадукацыі

Актывісты “Альтэрнатывы” завяршылі збор подпісаў сярод мінчукоў пад зваротам да Міністэрства адукацыі Рэспублікі Беларусь з прапановай уключыць у школьную праграму па прадмету “Гісторыя Беларусі” пазнавальных экскурсій для старэйшых класаў ва ўрочышча Курапаты – месца жахлівых сталінскіх рэпрэсій 1937-1941 гг.

За мінулыя 40 дзён каманда “Альтэрнатывы” абышла частку сталічнага мікрараёна Зялёны Луг, усяго ў падтрымку зварота атрымалася сабраць каля 2.000 подпісаў мінчукоў. Як адзначае кіраўнік арганізацыі Алег Корбан, гэтай лічбы дастаткова: “Думаю, для прыцягнення ўвагі чыноўнікаў гэтага хопіць, усялякім разам, на цяпер”.

Паводле ўражанняў актывістаў ад камунікацый з мясцовымі жыхарамі, ідэя школьных экскурсій мае падтрымку сярод грамадства. Вось якія высновы зрабіў спадар Корбан, паводле ацэнак актыўных зборшчыкаў подпісаў:

1. Не менш за 60% насельніцтва падтрымліваюць дадзены зварот да улады! У сённяшніх умовах – гэта станоўчы вынік. 15% – катэгарычна супраць (даволі часта матывуюць так: “Не установлено кто там расстреливал и кто там закопан», «Это не место для экскурсий», «Вначале уберите кресты, детям ведь будет страшно»), астатнія, а гэта прыкладна 25% не маюць пэўнай пазіцыі па гэтаму пытанню (можна пачуць такое: «Я подумаю», «Я почитаю в интернете, приходите потом», «Мне все равно»).

2. Абсалютна ўсе жыхары Зялёнага Луга ведаюць пра Курапаты, але вось жыхарам іншых мясцовасцяў часта даводзілася прыгадваць што такое і дзе гэтыя Курапаты.

3. Большая частка жыхароў дамоў №49, 55 па вул. Мірашнічэнкі, дзе ў 2017 годзе адбывалася супрацьстаянне з будаўнікамі бізнес-цэнтра захавала пазітыўнае стаўленне да ўсёй апазіцыі, але многія мяркуюць, што гэты пратэст ладзіў БНФ. Найбольш жыхары гэтых дамоў запомнілі Змітра, выпадак з кайданкамі, а таксама сцягі БНФ (тут луналі бел-чырвона-белыя сцягі).

4. Не ведаю колькі ў працэнтах, але значная колькасць людзей не зусім станоўча выказвалася да ўсталявання ў Курапатах дзяржаўнага мемарыяла. Некаторыя называлі гэты помнік «Прышчэпкай».

5. Не было часу і нават патрэбы цікавіцца народным стаўленнем да «Бульбашъ-холлу», але час ад часу людзі самі выказвалі свае пажаданні ў хутчэйшым закрыцці гэтай ганебнай рэстарацыі. Было толькі некалькі выпадкаў калі некаторыя, пачуўшы наш спіч са злосцю крычалі: «А, так это вы те, кто нас в ресторан не пускает? Идите-ка отсюда».

6. Міліцыя ў працэс нашай працы не ўмешвалася. Так мы без праблем збіралі патрэбныя аўтографы на вуліцы ды па кватэрах. Таксама было некалькі выпадкаў, калі трапляліся раз’юшаныя і магчыма неадэкватныя грамадзяне, быццам бы нават тэлефанаваўшыя ў 102.

7. У цэлым, народ наш пазітыўны! І, канешне, ён заслугоўвае лепшага. Але гэта ўжо іншая размова. 

Такім чынам, зварот накіраваны. Якім будзе рашэнне ўлады – стане вядома праз месяц.

Вам таксама можа спадабацца

Пакінуць адказ

Ваш адрас электроннай пошты не будзе апублікаваны.

Гэты сайт выкарыстоўвае Akismet для барацьбы са спамам. Даведайцеся пра тое, яе апрацоўваюцца вашы дадзеныя.