25 лістапада на Брылеўскім полі, што пад Барысавам, адгрымеў міжнародны фестываль «Бярэзіна 2018», падчас якога адбылася рэканструкцыя бітвы паміж Вялікай французскай арміяй Напалеона Банапарта і Расійскай імператарскай арміяй.
Паводле арганізатараў, у бітве ўзялі ўдзел ваенна-гістарычныя клубы і аб’яднанні, якія спецыялізуюцца на рэканструкцыі касцюма, узбраення, даспехаў і рыштунку XIX стагоддзя – 600 уніфармістаў, 110 коннікаў і артылерыя.
Перад пачаткам фестывалю, на могілках у вёсцы Студзёнка адбылася памятная цырымонія з ускладаннем кветак ля магіл французскіх вайскоўцаў. Мерапрыемства праходзіла з удзелам амбасадара Французскай Рэспублікі ў Рэспубліцы Беларусь, а таксама прадстаўнікоў мясцовай улады.
На Брылеўскім полі – аншлаг, які утварыў натоўп гасцей ды ўдзельнікаў рэканструкцыі. Побач з месцам былі ўсталяваны шэрагі гандлёвых кропак, дзе можна было добра і даволі танна паесці і сагрэцца гарачымі напоямі. За бяспекай мерапрыемства сачылі сотні пільных вайскоўцаў ды міліцыянтаў. Асаблівых эксцэсаў зафіксавана не было.
Перад пачаткам рэканструкцыі гасцей фэсту забаўлялі пастаноўкай традыцыйнай забавы расійскага дваранства – сабачага палявання на трусаў.
Рэканструкцыя гістарычнай бітвы пачалася а 13 гадзіне і працягнулася да 14.15. Варта адзначыць, гэтая пастаноўка перадае толькі прыблізны выгляд таго, што насамрэч разгарнулася на гэтым месцы 26-29 лістапада 1812 г. Відовішча ўражвае не толькі піратэхнікай, але і эстэтычным убраннем ваяроў з абодвух бакоў:
Бясспрэчна, у тыя дні на Брылеўскім полі вырашаўся лёс усёй Еўропы. Пераправа праз Бярэзіну стала моцным гераічным, але і трагічным эпізодам сусветнай гісторыі.
Відэафрагмент з рэканструкцыі:
Памятаць і шанаваць, каб тое ліхалецце больш ніколі не паўтарылася.
