На тэрыторыі канцлагеру “Трасцянец” адкрыты мемарыял ахвярам нацызму

29 чэрвеня на тэрыторыі канцлагеру смерці “Трасцянец” пад Мінскам афіцыйна адкрыты мемарыял ва ўрочышчы Благаўшчына. У час Другой сусветнай вайны нацысты тут знішчылі больш за 200 тысяч чалавек, пераважна габрэяў.   

У цырымоніі адкрыцця мемарыяла бяруць удзел Аляксандар Лукашэнка, а таксама дэлегацыі пяці краінаў: Аўстрыі, Ізраілю, Германіі, Польшчы і Чэхіі. Аўстрыйскую дэлегацыю ўзначальвае прэзідэнт Аляксандар Ван дэр Бэлен, нямецкую — федэратыўны прэзідэнт Франк-Вальтэр Штайнмаер, польскую — дзяржаўны сакратар канцылярыі прэзідэнта Кшыштаф Шчэрскі, чэскую — намеснік старшыні Палаты дэпутатаў Войцэх Філіп, ад Сусветнага габрэйскага кангрэсу прыбыў намеснік старшыні выканаўчага дырэктара ў пытаннях дыпламатыі Марам Штэрн.

Вядома, што пасля завяршэння афіцыйнага мерапрыемства, нямецкі прэзідэнт правядзе сустрэчу з нобелеўскай лаурэаткай Святланай Алексіевіч. Таксама вядома, што ў графіку сустрэч замежных гасцей няма наведвання не менш значнага мемарыялу ў Курапатах, дзе цяпер працягваецца грамадскае супрацьстаянне з уласнікамі скандальнай рэстарацыі “Поедем, Поедим”.      

Што датычна Трасцянцу, варта ўзгадаць і такі важны факт — гэта месца гібелі не толькі ахвяр Другой сусветнай вайны. Паводле даследчыкаў, на пачатку 1941 году ва ўрочышчы Благаўшчына каля Трасцянца савецкіх грамадзян расстрэльвалі супрацоўнікі НКВД. Таксама гітлераўцы расстрэльвалі ў Трасцянцы жыхароў Мінску, абвінавачаных у падпольнай дзейнасці. Але гэты факт сённяшні афіцыйны мемарыял замоўчвае.  

Першы крыж у Трасцянцы ў 2008 годзе быў усталяваны ў памяць пробашча Чырвонага касцёла Вінцэнта Гадлеўскага, расстралянага тут нацыстамі падчас вайны.

Падчас будаўнічых прац па стварэнню мемарыяла ў Благаўшчыне, тры драўляныя крыжы памяці ахвяраў рэпрэсій, якія ў розныя гады былі ўсталяваныя на гэтай тэрыторыі, улады вырашылі прыбраць. Атрымліваецца цікавы парадокс: афіцыйная ўлада робіць усё магчымае, каб “Трасцянец” стаў аб’ектам агульнаеўрапейскага значэння, але з пазбаўленымі ў яго змесце гістарычнымі момантамі.    

Вам таксама можа спадабацца

Пакінуць адказ

Ваш адрас электроннай пошты не будзе апублікаваны.

Гэты сайт выкарыстоўвае Akismet для барацьбы са спамам. Даведайцеся пра тое, яе апрацоўваюцца вашы дадзеныя.