Грамадская кампанія «Гавары праўду!» аднавіла штогадовую прэмію імя Святланы Навумавай –
2 сакавіка ў Мінску адбылася ўрачыстая цырымонія ўзнагароджвання лепшых з лепшых сярод грамадскіх дзеячоў і экспертаў.
Адкрыў цырымонію кіраўнік журы Уладзімір Дунаеў.
У намінацыі «Грамадзянская ініцыятыва 2019» лепшымі былі вызначаны экалагічныя пратэсты ў Брэсце. Неабыякавыя жыхары працягваюць пратэст супраць будавання ў іх горадзе акумулятарнага завода ТАА «АйПауэр», ужо два гады збіраюцца штонядзелю на адной з цэнтральных пляцоў горада, каб выказацца супраць запуску гэтага прадпрыемства.
Сярод прызёраў гэтай намінацыі – “Моладзевы блок” (каманда маладых кандыдатаў у дэпутаты, новае пакаленне актывістаў, якія займаюцца важнымі і няпростымі тэмамі: служба ў войску, адказнасць за наркотыкі, вышэйшая адукацыя).
Яшчэ адна прадстаўніца тройкі прызёраў гэтай намінацыі – кампанія “Маці 328”. Гэта ініцыятыва, якая аб’яднала сваякоў тых, чыя родныя асуджаныя па “наркатычных” артыкулах Крымінальнага кодэкса. Яны дамагаюцца змякчэння пакарання за некаторыя злачынствы, перагляду крымінальных справаў, паляпшэння ўмоваў у калоніях. Так, ніжэйшая планка пакарання за збыт наркатычных сродкаў была зніжаная, некаторыя вязні выпушчаныя па амністыі.
У намінацыі «Экспертная супольнасць 2019» перамогу атрымаў Андрэй Паротнікаў – эксперт па пытаннях нацыянальнай бяспекі і абароны.
Блогер Nexta адзначаны як лепшы палітычны блогер, а Арцём Шрайбман – як лепшы палітычны журналіст.
Спецыяльнымі дыпломамі вызначылі даследчыка Арсеня Сівіцкага,
а таксама незалежнага назіральніка Юрыя Вашчанчука, які падчас парламенцкіх выбараў 2019 г. зняў на відэа ўкід бюлетэняў на выбарчым участку ў Брэсце.
Пасля абвяшчэння вынікаў адбыўся невялікі фуршэт^
Прэмія імя Святланы Навумавай уручаецца грамадзянскай кампаніяй «Гавары праўду!». Прэмія заснавана ў 2011 годзе, пасля смерці Навумавай – палітолага, шматгадовага кіраўніка Дэпартамента палітычных навук Еўрапейскага гуманітарнага ўніверсітэта, аднаго з заснавальнікаў кампаніі «Гавары праўду». Ад 2015 году прэмія больш не ўручалася, але цяпер яе вырашылі працягнуць.
