“Альтэрнатыва” супраць адэптаў рускага свету на Беларусi

Беларускiя ўлады ў чарговы раз паказалi свой сапраўдны твар – была блакавана мiрная акцыя супраць адэптаў рускага свету на Беларусi.

 

9 снежня 10 сябраў «Альтэрнатывы» прыйшлi з вялiкай расцяжкай да будынка БДУIР, каб выказаць сваю пазіцыю, але iмгненна былi блакаваныя аховай унiверсiтэту, якой кіравалі невядомыя асобы ў цывільным, як вынік, парвалi расцяжку, пачалi браць пікетоўцаў у кола ды выцiсняць ад установы. I каго яны бароняць, Паулауца? 

Навіна абнаўляецца.

Фотаздымкі акцыі:

З месца падзеі перадае Радыё Свабода:

Акцыя, арганізаваная грамадзкай арганізацыяй «Альтэрнатыва» на чале з Алегам Корбанам, пачалася ў 15:00 ля галоўнага корпусу БДУІР, дзе працуе выкладчыкам паліталёгіі арыштаваны прарасейскі прапагандыст Юры Паўлавец.

Дзясятак пікетоўцаў прыйшлі з расьцяжкай «Выкладчык Паўлавец — здраднік». Удзельнікі скандавалі: «Ганьба фашыстам! Ганьба адэптам «рускага сьвету!»

— Мы хочам паказаць кіраўніцтву ўнівэрсытэту, што ёсьць група беларусаў, якія выступаюць супраць так званых прарасейскіх публіцыстаў, — сказаў Свабодзе Алег Корбан. — Таксама хочам давесьці да рэктарату, што варта больш уважліва ставіцца да падбору кадраў. Людзі, якія называюць Беларусь «недадзяржавай», а беларусаў — «неданацыяй», не павінны мець акадэмічнай пляцоўкі для выказваньня сваіх думак. Нашы актывісты гатовыя мірнымі спосабамі пікетаваць месцы, дзе жывуць і працуюць людзі кшталту Паўлаўца.

Неўзабаве з будынку БДУІР выйшлі чацьвёра маладых людзей, адзін з іх быў у камізэльцы з надпісам «добраахвотная дружына».


Яны пачалі наступаць на пікетоўцаў, завязаўся канфлікт. Да маладзёнаў далучыўся мужчына, які назваўся «выкладчыкам».

«Дружыньнікі» выхапілі папяровую расьцяжку з рук пікетоўцаў і пакамечылі яе.


Дыялёг адбываўся на падвышаных тонах. Асноўнай прэтэнзіяй з боку «дружыны» стала тое, што пікетоўцы «парушаюць грамадзкі парадак».

— А ваш выкладчык нічога не парушае, калі распальвае міжнацыянальную нянавісьць? — запытаў Корбан.

Студэнт Андрэй Карпіцкі меў на камізэльцы адмысловае пасьведчаньне «дружыньніка». На пытаньне карэспандэнта Свабоды, якую структуру ён прадстаўляе і чаму нападае на пікет, адказаў:

— Дружына — гэта такое ахоўнае абʼяднаньне ўнівэрсытэту. А гэтыя людзі хай не крычаць тут, хай сыходзяць…

Нечакана да канфлікту далучыўся прарэктар БДУІР па выхаваўчай працы Дзьмітры Кузьняцоў. Ён паведаміў, што «Паўлавец не затрыманы, а проста не выходзіць на працу». Падрабязьней пракамэнтаваць гэтае сьцьвярджэньне Кузьняцоў адмовіўся. Тым часам супрацоўнікі ўнівэрсытэту выклікалі міліцыю.

Алег Корбан з паплечнікамі вырашылі сысьці да прыезду праваахоўнікаў, каб пазьбегнуць затрыманьня.

— Паўлавец быў клясным выкладчыкам. Вельмі добра разьбіраўся ў палітыцы, — кажа студэнт Павал, які назіраў за тузанінай — адно шкада, няма ў нашай краіне свабоды слова.

— Ц-с-с, лухту кажаш, Паша! — перабіла хлопца аднагрупніца. — Свабода слова ў нас, канечне ж, ёсьць.

svaboda.org

 

 

Вам таксама можа спадабацца

Пакінуць адказ

Ваш адрас электроннай пошты не будзе апублікаваны.

Гэты сайт выкарыстоўвае Akismet для барацьбы са спамам. Даведайцеся пра тое, яе апрацоўваюцца вашы дадзеныя.